Z Brjazyny/Briesen. Njeźelu, 9. měrca 2025, jo se wótměła w rědnej starej brjazyńskej cerkwi wósebna namša. Jo se tam zapokazał Jakob Simon ako nowy faraŕ we tej wósaźe. Wón jo był dwě lěśe wikar w Dešnje a něnto jo ten nowy duchowny w serbskej jsy Brjazyna. Cerkwja jo była kopata połna a jo se kněžyła wjasoła atmosfera. Žognowanje a pósłanje do słužby jo pśewjadł superintendent Georg Thimme z Chóśebuza. Pśibytne su pak teke byli druge fararje a faraŕki chóśebuskego cerkwinego wokrejsa a zwenka njogo, ako teke reprezentanty komuny, wognjoweje wobory, sporta, góspodaŕskego žywjenja a gósći ze susednych jsow. Teke dwa cłonka Spěchowańskego towaristwa za serbsku rěc we cerkwi z.t. stej se wobźěliłej. Ako zajmny źěl namše su zastupniki wósadneje cerkwineje rady, amta, faraŕ Natho z Gołkojc, balokopaŕskego towaristwa a teke šule zwuraznili swóje doněntejšne wjelgin pozitiwne a wobogaśujuce zmakanja z Jakob Simonom. Ceła wjas se wjaseli na nowe a kreatiwne wósadne žywjenje. A tomu wótpowědowaś, to jo faraŕ Jakob Simon zlubił.