Casnikaŕ – teke ten serbski – ma nadawk a teke tu słušnosć, pisaś tu wěrnosć. Teke pón, gaž wóna bóli, nic wšyknym, ale wšakim, což se pokažo w tom lazowaŕskem lisće „Bejnje jadnobocny ...“. Ten jo Casnik slědny tyźeń wótśišćał na 2. boce pód rubriku „Pśipósłane“. Cytaŕ Měto Balašk z Barlinja jo z tym reagěrował na mój artikel „Teke Dolnoserbski gymnazium dej pśiwześ pśidatnych wuknikow. Frakcija AfD w měsćańskem parlamenśe jo pak była pśeśiwo tomu.“

Na zachopjeńku nejpjerwjej to: ja som dožywił toś to pósejźenje, togodla kradu wěm, co jo se tam stało. Až som na zachopjeńku hyšći raz wopisował, wó co jo šło we zwisku z gymnaziumami w Chóśebuzu, som měł za notne. Kuždy cytaŕ – wósebnje te ze jsow a drugich stron – ga njewě, co se stawa w Měsće. Gaž to ma kněz Balašk za nje-trjebne, jo to jogo wěc.