Jano jadnašćo dnjow jo było mjazy namšoma w Serbskej cerkwi w Chóśebuzu a w žylojskej cerkwi. Tak jo se zakóńcyło cerkwinske lěto ku gódam měrnje a 2025 jo se zachopiło muzikaliski.

Gódownica

Serbske cerkwinske lěto 2024 jo se klasiski zakóńcyło ze serbskeju namšu na gódownicy (1. Weihnachtsfeiertag) w Serbskej cerkwi Chóśebuz. Dokulaž jo faraŕ Tobias Pawoł Jachmann bóžko krotkodobnje wupadnuł, stej Madlena Norberg a Hartmut S. Leipner pśewzełej liturgiske nawjedowanje. Elias Bisse jo jeju z dalšnymi cytanjami pódpěrował. Mimo namšarjow jo teke dolnoserbski sekstet spiwał a Tim Schmidt jo grał na orgelach.

Wótměnjujucy jo Hartmut S. Leipner z namšarjami psalm 96 powědał: „Spiwajśo Knězoju nowy kjarliž; spiwajśo Knězoju wšykne wobydlarje togo swěta“.