Z Města/Cottbus. Pópšawem jo dejała byś zgromaźina měsćańskich wótpósłańcow (Stadtverordnetensammlung) w Chóśebuzu w tyźenju pśed gódami krotša ako howacej. Za cłonkow parlamenta ga jo była pśigótowana zgromadna gódownicka. Až pak jo było cełe wobradowanje dlejše ako planowane, k tomu jo wósebnje jadna wěc pśipomagała, wó kótarejž jo było na posejźenju w Měsćańskem domje to grono.

Wó co jo šło? Cłonki měsćańskeje zgromaźiny ga su kśěli něco wobzamknuś, což wjelgin chwata. W Chóśebuzu ga maju z tym, až co pśecej wěcej źowćow a gólcow wuknuś na gymnaziumje, wjelike problemy a starosći. Bóžko pak njejo na tych dogromady styri měsćańskich gymnaziumach tuchylu a nejskerjej hyšći dlej dosć městnow. A tak su se zagronite w měsćańskej radnicy rozsuźili, na gymnaziumach wutwóriś pśidatne klase, za což trjebaju ga teke pśidatne rumnosći a teke ceptarjow.