Z Grodka/Spremberg. Dajo wjele śamnosći, njepšawa a wjelikich starosćow na swěśe, a weto dajo pśecej luźi, kótarež napóraju naźeju a rozdariju radosć. K nim słušaju wót wjele lět te małe a wjelike krale katolskich a ewangelskich wósadow, te spiwarje tśoch kralow, kótarež k luźam pśidu a žognowanje za nowe lěto pśinjasu. Teke w Grodku, źož wóni su južo 30. dececembra prědny raz ducy byli k wobchodnikam (Geschäftsinhaber) a wikowarjam na Dłujkej droze, na Drježdźańskej droze a na Górskej droze. W lodach se te gwězdowe spiwarje – jich jo to lětosa 20 – rad pówitaju. Teke rowno pśibytne kupce su połnili te zběrawki. Z wótkubłaŕkoma Aniko a Lydia wót źiśownje „Bennolino“ su źiśi wót nowembra zwucowali pěś spiwow z kśesćijańskimi wopśimjeśami.