Ze Strjažowa/Striesow. Kuždy drugi tyźeń se zmakaju „Pśijaśele spiwanja Strjažow“ („Sangesfreunde Striesow“). Na probu k lětosnemu strjažojskemu gódownemu markoju su se mjaztym drugi raz zmakali. Ze swójimi gódownymi spiwami pón wustupiju njeźelu, 8. decembra – to groni drugi adwent –, wót zeger 14:00 na strjažojskem gódownem marku pśi strjažojskej zwónicy.

Teke lětosa jo planowany gromadny kus z pozawnowym chorom. Ako góstna spiwaŕka spiwa dešanaŕka Christina Kliemowa sobu. Mjazy nimskimi gódownymi spiwami buźo teke jaden serbski, a to jo „Na póli su pastyrje“ wót Mata Riza, kenž jo był komponist a ceptaŕ w Strjažowje. Wón jo něga iniciěrował spiwańske swěźenja, na kótarymž jo se wjele chorow wobźěliło.