Za aktualne decemberske wudaśe Rozhlada móžo Nowy Casnik Wam južo zawěsćiś, až teke Dolnoserb a Dolnoserbowka buźotej we njom dosć zajmnego namakaś. Tenraz nas docakajo južo pśedsłowo w dolnoserbskej rěcy a k za Dolnoserbow brizantnej temje. Hartmut S. Leipner how pód nadpismom „Naša serbska šula“ komentěrujo problematiku, kótaraž Dolnoserbskemu gymnaziumoju grozy glědajucy na plan šulskego amta, tam dalšny śěg 7. rědownje zaměstniś. To jo něco, „což źo na jědro serbskego byśa“, pśeto „wobstatk serbskich ceptarjow jo pśemały, a tak w dalšnej rědowni serbska wucba zewšym njebuźo móžna“. Dalej citěrujomy how wobmyslenja Leipnera: „Nichten njeby pśišeł na ideju, na sportowej šuli zarědowaś rědownju, kótaraž ze sportom nic njama cyniś, abo na ewangelskem gymnaziumje załožyś wuknjeńske kupki z ateistiskim profilom. Na jadnučkem serbskem gymnaziumje w Bramborskej jo wšak wócywidnje móžno, specifiski profil ignorěrowaś.“