Ze Žylowa/Sielow. Z takim pśemóžecym wótgłosom (Echo) njejstej iniciatorce Claudia Nowakowa (Noack) a Jenny Pätzowa licytej, ako stej tej Žylowaŕce zachopjeńk togo lěta wósebnu ideju zroźiłej a ju ako wuběźowanje do statka stajiłej.

Ta njejo se wobrośiła jano na Žylowarjow, ale teke na pśijaśelow a znatych – wšykne su mógli fota wót togo rědnego měsćańskego źěla Chóśebuza zapópadnuś, aby je k dispoziciji stajili za zestajenje jadnogo fotowego kalendarja za Žylow. „Wót maja do junija su naju kradu zasypali z wopšawdu rědnymi motiwami. Dwaźasća se wobźělujucych jo naju dogromady 148 fotow pśipósłało. Glědajucy na nje smej pód bejnym śišćom stojałej, což jo nastupało wuzběrk dwanasćo nejrědnjejšych a tych nejwěcej wugroniwych (aussagekräftigste). Togodla smej napominałej k zjawnemu „votingoju“ (wótgłosowanju), na kótaremž jo se 168 luźi wobźěliło“, wulicujo Claudia Nowakowa wó źěle organizatorkowu. Wjelgin spokojom stej z tym byłej, až šyrokosć wótedanych głosow jo zmóžniła fairny rozsud.