W oktoberskem wudaśu Rozhlada dajo wšake, což comy pórucyś. Tak namakajomy artikel w dolnoserbskej rěcy, kenž ma skerjej njewšednu, pśechwatajucu tematiku. Zgónijomy, až awtorka a wědomnostnica Justyna Michniuk jo teke certificěrowana strowotna trenaŕka lěsnych kupjelow (Waldgesundheitstrainerin), ak jo se intensiwnje z japańskeju metodu shinrin-yoku zaběrała. W swójom pśinosku „Lěs ako kluc k derjeměśu a ako pedagoga: Serbska mytologija a lěsne kupjele w młoźinskem kubłanju“ wóna tu metodu pśedstajijo, pśi tom na wuznam góle w słowjańskej mytologiji pokažo a pokaze k nałožowanju lěsnych kupjelow w ramiku (rěcneje) wucby dajo.