Z Błobošojc/Bloischdorf. W Dolnołužyskej serbskej muzejowej brožni su wobydlarje jsy tradicionelnje swój žnjowny swěźeń swěśili, a to w ramiku Muzejowych nocow w Łužyskej muzejowej krajinje, sobotu, 28. septembra. Wuslědki lětosnych žnjow su pokazali w historiskem rucnem wózyku a na gósćinaŕskem bliźe: Wjelebocne žni ze žnjownych płodow su połne idejow a kreatiwnje wugótowali, lěcrownož jabłuka, kšuški abo slěwki su dla póznego mroza w nalěśu felowali. Bóžko nic jano w Błobošojcach...

Na zachopjeńku su – jano – styri źiśi ze źiśownje Syjk (Graustein) woglědarjow z małym źiwadłowym kusom wó žnjach, žnjownem swěźenju a familiji rozwjaselili. Wjednica źiśownje jo k tomu groniła, až we toś tom lěśe jo se wjele źiśi zašulowało, a dla togo muse wótkubłaŕki wšo nowo natwariś. Někotare sceny su źiśi ga serbski pśedstajili, což pokažo, až angažement wokrejsa Sprjewja-Nysa na serbskem pólu se wupłaśijo.