Z Hochoze/Drachhausen. Wětš a wjedro njejstej mógałej Hochozarjam na tom drugem septembrje nic wucyniś. Su swěśili 19. Bramborski wejsny a žnjowny swěźeń, na kótaremž jo se teke młoźina aktiwnje wobźěliła. Pokazali su pśi tom, což wóni nejlěpjej mógu – to jo zdźaržanje a woplěwanje swójich tradicijow a nałogow. Tak su wóni prezentěrowali tradicionelne łapanje kokota, pśi tom jo jich pśewóźiła hochoska dujaŕska kapała „Drachencombo“.

Pśed tym jo młoźina za łapanje kokota pśi sportnišću startowała apel na druge Domowinske młoźiny. Kužda młoźinska kupka jo mógała jadnogo rejtarja ze źowćom w serbskej drastwje do Hochoze pósłaś. Městna su pak byli wobgranicowane na 15 pórow, aby mógali pśeglěd wobchowaś. Wót tych jo južo hochoska młoźina tśi póry stajiła, kótarež su teke w swěźeńskem pśeśěgu łapanje kokota reprezentěrowali. Styri póry su pśišli z chóśebuskich měsćańskich źělow, dwa z wokrejsa Dubja-Błota a źewjeś pórow jo pśichwatało z wokrejsa Sprjewja-Nysa.