Jadnučka regionalna rěc w Nimskej jo dolnonimšćina (Niederdeutsch, Platt). Njejo dialekt nimskeje rěcy, ale swójska germaniska rěc. Lěcrownož jo powědana we wósym zwězkowych krajach, jo situacija pódobna serbskima rěcoma. We wšakich regionach jo mamina rěc, we drugich ju jano stara generacija powěda a w dalšnych regionach musyš rěc wopšawdu zasej wóžywiś.

Hynac ako we Łužycy se mjazy dolnonimski powědajucymi akle zachopijo, wó rěcnem planowanju diskutěrowaś. To groni, se pśemysluju, kótare cele za rěcnu politku dajo, kótare napšawy su trjebne, aby zmócnili rěc w zjawnosći, šulach a tak dalej.

Dnja 10. septembera jo se k tomu źěłowa kupka „Spraakplaan Nedderdüütsch 2050“ prědny raz online zmakała. Organizěrował jo zmakanje Sekretariat za dolnonimšćinu w Hamburgu. Tam su južo kóńc maja źěłaŕnju k tomu pśewjadli, a to teke ze serbskim wobźělenim.