Towaristwo z Lutola

co pśistupiś Domowinje

Ze Serbskego domu/Aus dem Wendischen Haus. Ku tym 23 towaristwam, ako něnto pśisłušaju Domowinskej župje Dolna Łužyca, pśiźo nejskerjej skóro jadno dalšne. Jo to towaristwo „Kulturarche“, ako jo doma w gmejnje Lutol (Groß Leuthen) we wokrejsu Dubja-Błota (LDS). Njejo to tuchylu wjelike towaristwo, ale wóno a jeje cłonki su wjelgin pilne, staraju se ga za kulturne źěło a žywjenje w tej wjelikej gmejnje w Dolnych Błotach. Jeje pśedsedaŕka Christa Exlerowa jo na septemberskem pósejźenju župnego pśedsedaŕstwa swójo towaristwo pśedstajiła a jo to zwězała z pšosbu a z wótmyslenim, až co wóno pśistupiś Domowinskej župje. A to głownje togodla, dokulaž towaristwo „Kulturarche Groß Leuthen“ teke wjelgin glěda na woplěwanje serbskich tradicijow w tamnych stronach.

Župan dr. Pětš Šurman jo to wjelgin witał, rowno tak ako dalšne cłonki župnego pśedsedaŕstwa. „To jo wjelgin wažne, až teke w tych komunach a stronach na kšomje serbskego sedleńskego ruma na serbskem pólu ako Domowina źěłamy“, jo wón gronił.