Z Mósta/Heinersbrück. Chtož njejo měł zašulowanje swěśiś, jo se snaź woglědał 31. awgusta łapanje kokota na mósćańskem sportnišću. Wót wognjoweje wobory su se tam wudali. W pśirownanju k pjerwjejšnemu kóńcoju tyźenja jo było wjedro znjasliwe, teke za kónje , kótarež su se zasej wót Wehlanojc kónjecego dwóra k dispoziciji stajili.

Nejpjerwjej jo dało někotare rundy k rozwjaselenju – ako su jano słodkosći, paleńc a cigarety na wrotach wisali. Te su wisali na derje wumyslonej konstrukciji ze śěgnjeńskim powrjozom, pśez kótaryž njejsu kutšu trjebali, aby fortu pśiměrili. Zajmne slězynowe informacije wó rejtarjach, kenž su mimo jadnogo Hažowarja z mósćańskeje młoźiny byli, jo pódał Horst Nattke, šołta a wejsny zastojaŕ Mósta. Zgromadnje z Anneliju Adamojc jo wón to zarědowanje dwójorěcnje (dolnoserbsko-nimski) moderěrował a jo cełe wótpołdnjo originelne gronka pśinosował. Wó muzikaliske pśewóźowanje su se na tom dnju Błośańske dujaŕske muzikanty póstarali.