Z Turnowa/Turnow. Cele tradicionelnje jo wótběgnuło lětosne łapanje kokota w Turnowje, sobotu 24. awgusta. Wót kjarcmy „Goldener Krug“ su – pśewóźony wót Picańskich měsćańskich muzikantow – wumaršěrowali k sportnišću, źož jo šesć młodych rejtarjow na kónjach wót Jerolojc dwóra se wó titel žnjownego krala wuběźowało. Pódpěrowało jo jich 21 źowćow (Nowy Casnik jo w pśedslědnem wudaśu 20 pisał, za tu zmólku se zagronijomy) w serbskej swěźeńskej drastwje. Wšyknych wobźělonych jo na zachopjeńku Carolin Stecklinojc (Stecklina) publikumoju pśedstajiła – Elli Judisojc jo pśewzeła serbskorěcny part moderacije.

Wusokim temperaturam su luźe a zwěrjeta trocowali a to jo był kulojty wótběg. Marceloju Muše (Mucha) jo se raźiło, kokotoju głowu wótryś, z cymž jo wón wuběźił titel prědnego turnojskego žnjownego krala 2024. Z wótryśim kśidłowu kokota stej se jomu ako drugi a tśeśi žnjowny kral pśitowarišyłej Marius Mucha a Lukas Stapke.