Z Łužyce/Lausitz. Dogromady jo se 1.796 wósobow w Górnej Łužycy w tśich pśeběgach mjazy oktober 2023 a julij 2024 napšašowało, kake měnjenje maju k serbskej rěcy a k image-kampani „Sorbisch? Na klar.“ sakskego statnego ministaŕstwa za kulturu a turizm (SMWK), kótaraž wót 2020 za wěcej mjazsobnosći mjazy tym nimskim a serbskim w Górnej Łužycy wabi. Něnto pśedlaže prědne wuslědki ewaluacije teje kampanje. Wóni pokažu, až nastajenje napśeśiwo serbskej rěcy a jeje wužywanjeju w zjawnosći se pozitiwnje wuwijo – pśigłosenje w Górnej Łužycy pśiběra. 87% napšašanych ma to za wažne, až se ta rěc zaźaržujo (+ 7%). Mimo togo jo pśiběrało pśigłosenje, až serbska kultura turistisku atraktiwitu Górneje Łužyce pówušyjo, wót 76% na 84%. Teke dogromady jo se akceptanca za wužywanje serbskeje rěcy pówušyła. 41 % napšašanych w serbskem sedleńskem teritoriumje a 28% we wokolnych gmejnach ma to za pozitiwne, gaž we jich pśibytnosći se serbujo. Pśi prědnem napšašowanju 2023 jo jich hyšći było 37% respektiwnje 25%.