Z Gołbina/Gulben. Chtož jo pśi wušywanjeju nitku zgubił/a abo snaź njewě wěcej, kaž źo suckowe štapjenje, jo pšawje w Gołbinje pśi wušywańskem kursu.

Sobuźěłaśeŕka Dolnoserbskeje kulturneje akademije, Astrid Šramina, jo se starała wó śesć terminow w prozninach. „Som wědobnje prozniny wubrała, nic wšykne wujědu w toś tom casu a mógli teke źiśi sobu pśinjasć. Wót septembera zachopijo šula a luźe maju zasej wjele drugich terminow“, groni wóna.

Fachowe pódpěranje jo dała Mechthild Scholzowa, abo jo na pšašanja wótegroniła a jo tipy dała. Wóna jo teke wšakorake štapjenja rozkładła, ako kijaškowe štapjenje abo suckowe štapjenje. Wóna jo pokazała, kak zwušywaj łopjeno optimalnje a kak se dej směr nitki nejgódnjej hyś. „Rucne źeło jo mě južo pśecej lažało a mě wjasele gótowało. Ako młode źowćo som južo nawuknuła wušywaś. Ale akle ako som se zaběrała z drastwu, som zasej lubosć za wušywanje namakała“, wulicujo Mechthild Scholzowa.