Z Bórkow/ Burg. Kužde lěto na drugem kóńcu tyźenja julija se wótměwaju rucnikaŕske a burskewiki w Bórkowach. Teke lětosa jo dało sobotu a njeźelu na swěśenišću bogaty program. Dnja 13. julija jo Marlene Jedro moderěrowała a pśi tom teke někotare informacije wó tej jsy, wó Błotach, starych casach a tudskem žywjenju pódała. Zachopjeńk jo na wobyma dnjoma zeger źaseśich z dujaŕskeju muziku wugótowany był. Pótom jo sobotu domowniske a drastwine towaristwo Bórkowy z.t. mjazy drugim burski pójědank prezentěrowało. Za źiśi jo pódla skokańskego groda a rejtowanja na ponyjach teke pupkowe źiwadło dało. Na jawišću su na pśikład hyšći „Vier gute Saiten“ gercowali. Mimo togo stej tam serbska drastwina rejowaŕska kupka Barbuk a tradicionalne towaristwo Smogorjow ze swójimi rejami wustupowałej. Wjacor su hyšći gósći mógali rejowaś k słušnej muzice wót live-band Scarlett.