Z Lěšćow/Hornow. Za swóju lětosnu głownu zgromaźinu jo se Domowinska župa Dolna Łužyca jadno wósebne městno wupytała. Pśewjasć jo kśěła ju tenraz w něgajšnej samostatnej župje Grodk. Dłujko pśemyslowali su w župnem pśedsedaŕstwje, źo by se mógała toś ta wažna zgromaźina pśewjasć. Na kóńcu jo se roźeła ideja, z njeju hyś do jadneje nimsko-serbskeje jsy w serbskem sedleńskem rumje. Rozsuźili su se na kóńcu za wjas Lěšće/Hornow – teke dla togo, dokulaž ma toś ta wjas mócne serbske tradicije, wósebnje w casu DDR. Su tam měli do lěta 1990 Domowinsku kupku a znatu serbsku młoźinsku rejowańsku kupku.