Z Dešna/Dissen. To słuša južo k tradiciji, až pśiźo młoźinski aktiw Domowinskeje župy Dolna Łužyca do jatš do Domowniskego muzeja Dešno na wugódnośenje zapustow a na rozgrono wó pśiducych tšojenjach. K tomu su se slědny stwórtk tam pśinamakali zastupniki sedym Domowinskich młoźinskich kupkow, na pśepšosenje młoźinskego koordinatora Tobiasa Ungera. Jo jich było mjenjej wobźělnikow ako w slědnyma lětoma, ale to njejo dobru lawnu skazyło. Tobias Unger jo dał krotki pśeglěd k zapustam a pokazki za pśiduce plany. Wón jo zwěsćił, až jo było lětosa wjele profesionelnych fotografow k zapustam ducy, a te fota su se teke prezentěrowali w socialnych medijach, kaž na Instagramje. Wón jo apelěrował na młodostnych, aby wóni južo něnto myslili na kalendaŕ młoźinskego aktiwa 2025 a až deje fotografow wó fota pšosyś. Mimo togo jo dał do rady, sponsorowy wjacor ako źěk wugótowaś, dodatnje k cesnej runźe pla zapusta. „Za pśiduce lěta dojadnajśo se pšosym lěpjej, aby njenastali problemy ze susednymi jsami“, jo Tobias Unger gronił.