Februarski Rozhlad jo zasej wudaśe z póměrnje rědneju licbu pśinoskow w dolnoserbskej rěcy. Z pjera Hartmuta Leipnera cytamy pśinosk „Ze žywjenja serbskego fararja Bogumiła Šwjele“. Tema se góźi tek derje we zwisku z aktualneju wustajeńcu w Serbskem muzeju w Chóśebuzu, ako pokažo (hyšći do 21. februara) derbstwo Bogumiła Šwjele. Zajmne jo, kaž Leipner nas ze casowymi wobstojnosćami a pitśku tek z familijowym žywjenim togo serbskego fararja blišej zeznajo.

Dalšny pśinosk we tom Rozhlaźe jo mjaztym sedymy źěl serije Michaela Meyera wó pśiswójźbnych a móžnych prědownikach łapanja kokota. K januarskemu wudaśu smy pisali, až ta serija jo na kóńcu – wódajśo, ta źo dalej. Něnto se pśedstajiju teze wó póchaźe nałoga „Hahneköppen“ a gusecego rejtowanja. A awtor śěgnjo swóje konkluzije ze wšych pśirownujucych rešeršow glědajucy na łapanje kokota w Dolnej Łužycy.