Z Chóśebuza/Cottbus. Tuchylu se wjerśi w Serbskem muzeju wšo kołowokoło jadnogo nejwuznamnjejšego Dolnoserba, Bogumiła Šwjele. Zwězane jo to z wustajeńcu „Darjona wěda“ wó swójom wjelebocnem statkowanju, ku kótarejž jo Serbski muzej wobšyrny ramikowy program pśigótował. Tyźeń srjodu jo kuratorka Christina Kliemowa na Serbske blido z Hartmutom Leipnerom pšosyła, kótaryž jo wó temje „Cerkwja za Šwjelowy cas: w Chóśebuzu, we Wochozach w Dešnje“ powědał. Bóžko jo jano mało luźi pśišło, ale weto jo žywa diskusija nastawała.

Rowno w casu, ako jo Šwjela swój studium teologije wobzamknuł, jo měło pódtłocenje serbskeje rěcy w Pšuskej swój wjerašk. 1908 jo wón swój amt ako pomocny faraŕ w Serbskej cerkwi pušćił, dokulaž njejo kśěł nimski prjatkowaś. Pó pěś lětach ako wikar w Wochozach jo skóńcnje farski amt w Dešnje pśe-wzeł a tam až do lěta 1941 wóstał.