W lěśe 1998, ku góźbje 125. narodninam Karla Nowaka, jo se wótwóriła prědna pósmjertna wustajeńca jogo wobrazow w Serbskem muzeju w Chóśebuzu pód titelom „Zabyty mejstaŕ/Der vergessene Meister\". Gaž wón jo tencas južo ako zabyty płaśił – kak se to ma pón źinsa, 150 lět pó jogo narodu?

Což Karlo Nowak jo mólował, to njepasujo tak pšawje do typiskich klišejow. Modiske směry jogo casa kaž ekspresionizm, dadaizm abo surrealizm njejsu byli to, kótaremuž jo wón kśěł se w swójom wuměłskem twórjenju pśiwobrośiś. A na žeden pad njejsu jogo wobraze wótpowědali socialistiskemu realizmoju. Nejlěpjej drje pasujo, gaž ako cuśniwego realista pomjenjujomy togo serbskego mólarja, kenž jo se 28. nowembra 1873 w Lěsce (Lieske) naroźił. Zawóstajił jo nam pśedewšym akwarele krajinow z Dolneje Łužyce, mjazy nimi wjele chóśebuskich motiwow.