Z Města/Cottbus. Co móžomy lěpjej cyniś pśi wobchadanju z našeju zemju? Co dajo se dojśpiś z ekologiskim rolnikaŕstwom a zagrodnikaŕstwom, a na kaku wašnju? Takim pšašanjam jo pśedslědnu srjodu w Serbskem muzeju Chóśebuz 16 gósći w ramiku Serbskego blida swój zajm pśichyliło, mjazy nimi tek někotare cłonki kolektiwa wakuuma. Informěrowała jo jich k tomu Maja Šramojc z Chóśebuza – se wě w serbskej rěcy. Z jadnorymi słowami, až jo to było derje k rozměśu. Absolwentka Dolnoserbskego gymnaziuma a sobuzałožaŕka kolektiwa wakuum jo nejpjerwjej wó swójej žywjeńskej droze wulicowała, kótaraž jo ju w lětosnem měrcu wjadła na ekologiske dwórske zjadnośeństwo „Gut Ogrosen“ wót krajnego zwězka Demeter w pódzajtšu z.t.. Maja jo wuzwignuła, až se jej wjelgin spódoba to źěło tam – we wšych wobłukach wóna statkujo, lěc pśi kubłanju rostlinow abo zwěrjetow, a wóna ma wósebne wjasele pśi wjeźenju wjelikich rolnikaŕskich mašinow. Wóny dwór we Hogroznej (Ogrosen) ma teke zwiski k Demeter-dwóram w Górnej Łužycy a ku Górnoserbam.