Z Janšojc/Jänschwalde. Wjele, wjele źiśi ze swójimi starjejšymi abo starymi starjejšymi jo slědowało 11. nowembra w Janšojcach pśepšosenju na nabóžninu a lampionowy pśeśěg. Źiśi nabóžninskeje wucby su pśišli spiwajucy a z lampionami z faraŕnje – spontanje jo jich faraŕ a.D. Ingolf Kšenka na gitarje pśewóźił – a su dypkownje do cerkwje dojšli, kótaraž jo była južo až na slědne městno napołnjona. Tak su musali te, ako su pśepózdźe pśišli, stojaś. Źiśi su byli wócakowanja połne a dobreje mysli. Tšojenje wó swětem Mjertynje jo se pokazało na płachśe. Pśedcytali su jo wósadnice Tina Krokorowa, Nele Kretšmarojc a Kathrin Dabowa.