Ja se wót swójich drogowanjow pśecej teke knigły a CD-je sobu pśinjasu, aby měła doma hyšći dlej rědne dopominanja. A gaž dožywijom ducy wšuźi na swěśe cuzu kulturu, musym ju z mikrofonom zapópadnuś. Teke w Grönlandskej jo to tak było. Wětšyna ludnosći tam su Inuit, luźe, kenž su doma we arktiskich krajach ako tam a teke w Kanaźe, Alaska a Sibirskej. Jich nałogi a žywjeńska wašnja dopominaju na te indigenych ludow a spócetnych rodow we Americe.

Tak mam w mójej zběrce na fośe wótmólowanego muskego, kenž jo za turistow grał improwizěrowanu muziku z rucnym bubonom. Wón jo spiwał ako něga šamany (w rěcy Inuit Angakkoq). A snaź jo se to hyšći až do źinsajšnego zdźaržało, dokulaž do wótlažanych jsow w pódpołnocy lěbda turisty pśidu a su pśišli.