Wón sam hupśestrějo to njebjo, a chójźi pó žwałach mórja. Wón gótujo Formana na njebju a Oriona a Baby a gwězdy pódpołudnja. (Hiob 9,8-9)

Wó kótarych gwězdnach (Sternbilder) jo grono w Prědnem abo teke Starem testamenśe biblije? Nimski se Formanoju groni Großer Wagen, kenž jo źěl Wjelikeje mjadwjeźice. Orion jo gwězdno, kenž jo widobne pla nas na zymskem njebju, jomu se górnoserbski groni Kosy. A Baby? Nimski móžomy groniś Siebengestirn abo Sieben Schwestern. W górnoserbskej ewangelskej bibliji se gwězdnoju groni Čečeranc a w katolskem pśestajenju Plejady. Pó grichiskej mytologiji su Baby/Plejady źowki titana Atlasa, młode źowća w swajźbaŕskem starstwje, nymfowki. W kraju Aotearoa/New Zealand na pśikład, kenž lažy na połdnjowej połkuli zemje, se toś tej gromaźe gwězdow groni Matariki, což jo zrownju mě swěźenja nowego lěta domorodnego luda Maori a zrownju kazniski swěty źeń cełego kraja.