Z Janšojc/Jänschwalde. Na swój stary konsum z DDRskego casa su luźe w Janšojcach wjelgin gjarde. Wón jo wše case pśežywił, te dobre a te špatne. Gaž su pó lěśe 1990 w młogich jsach konsum a druge lody zacynili, jo wóstała janšojska loda wótcynjona za nakupowanje – raz tak a pón zasej hynak.

Tuchylu jo wón zacynjony. Ale nakupowaś mógu w Janšojcach dalej, w jadnom drugem domje. Stary konsum, ako jo něźi 200 kwadratnych mejtaŕi wjeliki, ga se něnto pśetwarijo a wutwarijo. Na starosći ma to Martin Grünewald ze susedneje Radowize. Wón jo ako kuchaŕ južo w młogich domach warił – teke w drugich krajach – a jo teke wobsejźaŕ togo „Suppenstübchen“ w Chóśebuzu na Starych wikach.