Nic jano w Lubinje protestěruju někotare wobydlarje pśeśiwo natwarjenju nowych blokow za wuběgańcow, mjazy nimi teke kśesćijany. Jaden źěl protestěrujucych se bój, až z cuzbnikami pśiźo wěcej kriminality do města. Ale to jo pśez medije insceněrowany tšach, dokulaž cuze Nimce samskeje licby, starstwa a socialnego statusa by rowno tak wjele kriminality do města pśinjasli ako wukrajniki. Drugi źěl protestěrujucych wiźi to z praktiskego boka. Južo něnto njejo dosć gójcow, źiśownicow a wucabnikow w měsće. W praksach, źiśownjach a šulach njejo dosć dolmetšarjow za dobru komunikaciju z wukrajnikami. Nježli by nowe wobydlarje do źěłowych wikow integrěrowane byli, trajo nanejmjenjej tśi lěta. Mimo togo matej město a wokrejs Dubja-Błota wjeliki źěl twarjenja takich domow zapłaśiś.