Ze Žarowa/Żary/Sorau. Město Žarow lažy źinsa w Pólskej, słuša pak do starodawnego serbskego ruma. W slědnych lětźasetkach jo nastało w tak pomjenjonej „pódzajtšnej Dolnej Łužycy“ wjele iniciatiwow, aby se pólske wobydlarje wuwědobnili, až su kórjenje jich domownje serbske. Hyšći źinsa nadejźoš how unikatowe kulturne derbstwo.

Kake projekty ga maju?

We februarje jo žarojska měsćańska źiśownja pśewjadła projekt „Na slědach stawiznow města Žarow“. Pedagogiska inowacija wopśimujo teke dolnoserbsku kulturu, groni wótkubłaŕka źiśownje Barbara Hausmann: „Bóžko jo serbska rěc how zajšła. Comy pak ju źiśam z projektom zbližyś. Teke, kake tradicije, nałogi a swěźenje su něga woplěwali.“ Wjele materiala za źiśece zaběry – kniglicki, bildki, cd – su za žarojski projekt darili Domowina, Rěcny centrum Witaj, Šula za dolnoserbsku rěc a kulturu a Dolnoserbska kulturna adademija. Pśez to su se źiśi a wótkubłaŕki kradu wjaselili.