Drjejce/Drewitz. Gaž žni se zachopiju a prědna trajda ako jacmjeń se seco, su teke carne jagody zdrjałe. Wóni su strowe a derje słoźe. Woblubowane su wóni pśez generacije ako pśiběranje ku gibanym klejzam (Hefeklöße). Wó tom su južo pjerwjej w Casniku pisali. W lěśe 1930 (numer 27) jo stojało na pśikład: „Senowe žni su pód kšywom a te źowća maju něnto cas, te carnice tergaś. Źož źomy pśez gólu, móžomy wjele tych źowćow we njej wiźeś, pilnje te ruki te jagody do tych zbórkow tergaju. Zachadny tyźeń su płaśili carnice we Chóśebuzu na wikach 60 pjenježkow ten punt.“

Chtož jo žywy na jsy a rad jo w jagodach, znajo hyšći źinsa swóje flacki. Teke my smy se wudali „do jagodow“. My smy byli w gólach mjazy Drjejcami a Grabkom, na pódpołnocnem boku drjejcańskego lětanišća. Tam pśi gólnej drožce su rědne carnicowe kricki wiźeś. Jo, a na nich su w bogatej licbje rosli te dobre jagody. W Janšojcach su mě wulicowali, až teke na Ługach a we Wjelikej góli su pśecej namakali take carne jagody.

Kake rostliny su carne jagody?