Z Dešna/Dissen. Lětosa buźo šesć lět, až bu w aprylu 2017 w Dešnje załožone nowe serbske towaristwo „Serbske koparje/Wendische Aus-wahl“. K njomu słuša tuchylu něźi 50 cłonkow – to su balokoparje z młogich serbskich jsow a dalšne muske a žeńske, ako kśě pódpěrowaś na wšaki part mustwo „Serbskich koparjow“. Bilanca tych prědnych šesć lět njejo špatna, ale wěrno teke jo, až by była bźez korony hyšći wó wjele lěpša. Wjerašk togo jo, až jo łoni w lěśu na EUROPEAŹE w Korutańskej źaseś koparjow sobu grało w zgromadnem „Serbskem mustwje“, ako jo se wudobyło wjelgin dobre 3. městno mjazy 19 mustwami z cełeje Europy.

Mjaztym pak jo ta ceła wěc taka, až žedne balokoparje starstwa a drugich zawinow dla njebudu abo njekśě wěcej pla „Serbskich koparjow“ sobu graś. Jim to dosega, až mógu dalej aktiwne byś we swójich domacnych mustwach w Dešnje, w Žylowje a hynźi. Togodla jo něnto wjelgin wažne, dobyś nowych młodych talentěrowanych balokoparjow za „Serbskich koparjow“. A to płaśi teke za žeńskece mustwo.