Z Dešna/Dissen. 28-lětny Dešanaŕ Norman Schomber rěžo južo swóju pětu swinju. Tencas jo wón w źasetej rědowni rolnikaŕstwo wuknuł. Tola něnto jo pówołanje pśeměnił a cyni wukubłanje pla LEAG na industrijowego mechanikarja. Rucku za rolnikaŕstwo ma wón weto a teke wjaseli se pśi źěle. Wón źěła pak lubjej za swóju pótrjebu ako za wjeliki rolnikaŕski zawod. Pla swójich něgajšnych źěłodawarjow jo w sezonje cesćej 12-15 góźinow wob źeń źěłał.

K swójim 18. narodninam jo dostał wót swójich pśijaśelow prědnu swinju darjonu. Groź jo na dwórje južo stojała, wšo dalšne jo natwarił w pśichodnych lětach sam kus pó kusku. Gaž jadnu swinju zašlachtuju, ga mógu se něźi dwě lěśe wót togo měsa žywiś. Pśiducy raz to stej pón južo dwě swinje byłej, kótarejž jo se Norman Schomber napórał. „Swinje su towarišne a njekśě sami byś. Mimo togo dwě swini žerjotej lěpjej, wónej animěrujotej se mjazy sobu k žranju“. Cełe lěto jo Beatu a Brigittu, tak jo tej sodłowej swini pomjenił, futrował. Wšake za to jo na swójej roli kubłał, pśedewšym kulki. Jogo pśijaśele su jomu pomagali pśi sajźanju a kopanju kulkow.