Z Prjawoza/Fehrow. Prjawozarje mógu byś napšawdu wjelgin glucne! Maju ga we jsy hyšći rědny gósćeńc a k tomu teke wjeliki zal. Wšykno to wobgóspodarijo Lukasojc familija južo we wjele generacijach. Wóna se teke za to póstarajo, až mógu w tej serbskej jsy w Bórkojskem amśe kužde lěto swój zapust wóswěśiś w rědnej wokolinje!

Tak jo to teke było zachadnu njeźelu, ako su tam rušowali na 140. zapusće. Wokoło 50 pórow z młoźiny a ze staršych generacijow jo we dłujkem wjasołem pśeśěgu śěgnuło pó jsy, a z nimi teke 17 źiśi, to nejmłodše tśi lěta stare. Jich su pśewóźowali Błośańske dujaŕske muzikanty. Zastali su na pěś stacijach we jsy, źož su pón dostali sponsory – jich jo było dogromady 24 – swóju cesnu štucku a zapustarje swóje pjenjeze.