Z Janšojc/Jänschwalde. Na 14. decembrje su pśedšulska kupka, nimska źiśeca kupka a WITAJ-kupka źiśownje Lutki z Janšojc k muzeumoju do jsy jěli, aby serbske źiwadłowe graśe „Štrumpicka“ w muzeumje se woglědali. Wšykne źiśi su ako pśiwězane na blidach sejźeli a glědali, co jo Wiebke Schulzojc z utensilijami cyniła. Z barwojtymi płachtami, pałkaŕskimi klamrami, štrumpami a drugimi wěcami jo wóna źiśam mjenja barwow, licbow a druge serbske słowa na luštnu wašnju nawucyła. Někotare źiśi su samo sobu licyli abo su kśěli spiwy sobu spiwaś. Nejmłodše su wjeliki špos měli a se chachali. Za źiwadłowym graśim su se z plackami a tejom mócowali a pón su wšykne hyšći swójske, barwojte „štrumpicki“ wubaslili a z nimi ned grajkali. To jo luštne a zajmne dožywjenje za źiśi było.