Z Łužyce/Lausitz. Pśed 175 lětami, 24. januara 1848, jo w Turnowje se naroźił dolnoserbski ceptaŕ, ludowědnik a rěcywědnik Mjertyn Moń. Bramborski Serbski Casnik a pó jogo smjerśi teke Časopis Maćicy Serbskeje stej młoge jogo pśinoski wózjawiłej.
Z burskego dwóra
do uniwersitowu
Mjertyn Moń jo se naroźił w burskej familiji Hanzo Monja. Do lěta 1870 jo wón chójźił na Friedrich-Wilhelmowy gymnazium w Měsće. Wón jo studěrował klasisku filologiju w Lipsku ako teke wót zymskego semestra 1872/1873 w Halle. Tam jo Moń złožył w oktobrje 1875 eksamen. Ze zachopjeńkom zymskego semestra 1875 jo zastupił do probowego lěta ako wědomnostny pomocny wucabnik na gymnaziumje w hanseatiskem měsće Seehausen.
Jo w Eisleben 30 lět
dłujko ceptarił
Teke wót lěta 1876 jo wón pśiwzeł městno w Lutherowem měsće Eisleben ako pěty rědowy wucabnik na měsćańskej wušej bergaŕskej šuli pśi Juliusu Wilhelmje Otto Richterje. Tam jo wón ceptarił 30 lět až do swójeje smjerśi w lěśe 1905. Jogo syn Arnošt Moń jo był oberst a studijny raźc. W Turnowje dajo wokolicu Mjertyna Monja a spomnjeńsku toflicku pśi jogo rodnem domje.