Z Wjerbna/Werben. W zalu gósćeńca „Ku gwězdźe“ jo gmejnske zastupnistwo slědny pětk wjacor zachadne tśi lěta woklapało. Šołta Joachim Dieke jo krotkocasnje dnjowny pórěd změnił, aby žednym zmóžnił se pśedstajiś. Ulrich Geis wobgóspodarijo supermark na kólasach a buźo wót 13. februara pó jsy ducy. Ze swójeje mobilneje lodki pśedajo žywidła, piśa, casopise a druge. Kuparje mógu pla njogo teke listy wótedaś, znamki kupiś abo knigły z biblioteki wupóžycyś. Tom Lüttge jo ze swójeju žeńsku južo łoni něgajšnu Hanuškojc pjakaŕnju pśewzeł, a to su Wjerbanarje raźi pśiwzeli. Gjarźe jo šołta Dieke wjerbańskego nimskego mejstarja w motocrosu, 16-lětnego Felix Melnikoffa, pśedstajił. Jogo su wobydlarje z wjelikim aplawsom mytowali.