Błośański krimi jo pśecej dobre rozwjaselenje. Bóžko mamy pśemało takich pórucenjow na serbski. Ale něco wuběrnego pak južo dajo na tom pólu, ga knigły „Njaboga nymfa“. To jo napněta a humorna kriminalka wót wědomnostnice, Dolnoserbowki, Beaty Mičerlichoweje. Awtorka jo to napisała ako skóńcne źěło studiuma na literarnem instituśe. „Njaboga nymfa“ jo pśestajona do dolno- a górnoserbšćiny, ale rowno dolnoserbska wersija ma ten wósebny błośański pśišmek, za kótaryž musymy wuźěkowaś Marcusoju Kóńcarjoju. Kuždego słowka wónja za błośańskimi zelami, kuždy rěcny wobrot zanurijo cytarja hyšći dłymjej do psychologiskich paslow. Teke gaž dolnoserbšćina njejo Waša mamina rěc a se njecujośo wěste pśi jeje nałožowanju, pó tśich bokach to zacuśe se minjo. Buźośo se zamysliś dla źiwnych wobstojnosćow, kenž su wokoło našych głownych charakterow, a buźośo napněte.