Z Chóśebuza/Cottbus. Njeźelu, 13. nowembra su se janšojske žeńske pód nawjedowanim Maksimiliana Hasackego zmakali w Serbskem domje k intensiwnemu rěcnemu dnju. Wót srjejźi lěta zmakaju se raz wob tyźeń w janšojskem muzeju k połteragóźinskej wucbje. Maksimilian Hasacki jo južo wuwił stwórty słowoskład za kurs pó ASLA-metoźe. Temy jadnotliwego słowoskłada su temy wšednego dnja, wopisuju wejsańske žywjenje a twórje bazu za dalšne temowe póla. Za stwórty słowoskład jo wón se zaběrał pśedewšym z póžedanjami žeńskich a jo wuzwólił drastwinu temu. Pśi tom jo dostał pódpěru swójeje rěcneje wuknice Romy Ruffojc, wóna jo librowała wobraze zachopinajucy wót wušywańskich glickow, rejujucych žeńskich w drastwach, wšakich rejowańskich pórikow až k motiwam zapusta. Wóna jo teke južo wótere wokable k nowemu temowemu póloju rešeršěrowała.