Z Łužyce/Lausitz. 11. nowember jo definitiwnje źeń z dwěma wšakima wuznamoma. Tak su w karnewalowych srjejźišćach pěty lětny cas zazwónili. Za žednogo njejsu na tom dnju pampugi felowali. W Chóśebuzu na pśikład su larbaki (Narren) dypkownje zeger 11:11 móc pśewzeli. Lětosa jo se mógło zasej 33. naběgowanje na radnicu pó tradiciji wótměś.W slědnyma lětoma njejo to móžno było dla korony abo jano wobgranicowane.

Larbki a larbaki wót towaristwow VCK, ICC, KikaC ako teke towaristwo „Die Narrenweiber“ něnto zasej maju tu móc. Radnicowy kluc a prozna měsćańska kasa buštej wót pśirědowanego a komornika Markusa Niggemanna a decernenta Thomasa Bergnera pśepódanej. Wšak móžomy z togo wuchadaś, až Tobias Schick dnja 30. nowembra w amśe nowego wušego šołty města Chóśebuza karnewalistam zasej wšykno wótewzejo.