Z Wjerbna/Werben. W Pratyji za lěto 2023 se wjerśi wšykno wokoło błośańskeje jsy Wjerbno. Cytaŕ namakajo wšake zajmnostki – wósebnje ze stawiznow, wó znatych a sławnych serbskich wósobach, wó cerkwinskem žywjenju, wurězki ze starych Casnikow a wó zachadnych tšojenjach. Ned w prědnem artiklu se pśedstajijo we jsy wobluwana, nět bóžko njaboga serbska kjarcmaŕka ze Smalic gósćeńca. Młogi raz rozwjaselece, drugi raz tšašne su krotke wšedne powěsći ze starych serbskich casnikow w 19. a 20. stolěśu, rozpšawiju ale tež wó wudrogowanju do cuzych krajow. Něźi 15 procentow Wjerbanarjow jo tencas do Afriki, Awstraliskeje abo Ameriki wudrogowało z naźeju, až namakaju lěpše žywjeńske wobstojnosći. Nejsławnjejšy syn Wjerbna, Mato Kosyk, akle w Americe jo mógał studěrowaś teologiju a tam wordował jaden wót tych wuznamnych serbskich basnikarjow. Drugich pśicynow dla jo ga se do Grönlandskeje wupórał Matej Waŕmo, rozmjej ako misionaŕ pla inuitow.