Z Janšojc/Jänschwalde. Za kuždego jo wažne, se wopóznaś z politiskimi a zastojnstwowymi strukturami swójogo kraja. Za co jo zwězk zagronity, za co jo zwězkowy kraj zagronity, za co jo město zagronite a kak to wšykno funkcioněrujo: To teke dorosćone njewěźe pśecej. Jo, a co zapšawym su nadawki jadnogo wokrejsa? To dejali źiśi wuknuś. Zakład za to jo stwórił Sejm wokrejsow w Nimskej (Landkreistag). Nakładnistwo „Kommunal- und Schul-Verlag“ jo w kooperaciji z tym sejmom pśigótowało kniglicki. We nich stoj, co wokrejs cyni, kake nadawki ma. Zawěsće stoj tam teke, co krajny raźc dej gótowaś! To cełe jo źěł zjawnostnego źěła wokrejsow a se wobrośijo na nejmłodšu generaciju. Kuždy wokrejs móžo to za sebje indiwidualizěrowaś. Wokrejs Sprjewja-Nysa jo ten zešywk něnto wobźěłaś dał. To pśestajenje jo pśewzeła Marija Elikowska-Winklerowa. Něnto mógu se małe cytaŕki a cytarje wobgóniś w serbskej rěcy, kak to běžy z wokrejsnymi drogami, wótpóranim wótpadankow abo ze šulskim busom.