Z Města/Cottbus. Až su w młoźinskem klubje „Chekov“ Serbam pśichylone jo se lětosa pokazało pśi festiwalu „... the unoptimal festival“, ako jo był 3. a 4. junija. Na gruntach chóśebuskego Kupanišća pśi rěce (Strombad) su cłonki Towaristwa za spěchowanje subkulturelnych aktiwitow z.t., kótarež jo nosaŕ kluba, wugótowali ten swěźeński kóńc tyźenja.
Na tom prědnem swójskem festiwalu wót nich jo, njeźiwajucy na kopicu muzikarjow, wósebnje nadpadnuło, až su byli toflicki w nimskej, engelskej a dolnoserbskej rěcy. Cłonki kluba su tak markěrowali nejwažnjejše stacije a stojnice na tom terenje pśi Sprjewi. Tak su serbskorěcnym gósćam toflicki „jěza“, „toaleta“, „bara“ abo „Kólasa pšosym wence wótstajiś!“ k pomocy byli, aby se lěpjej orientěrowali.