Z Trjebina/Trebendorf. Namše zwenka cerkwinskich murjow njejsu za Slěpe njewšedne. Ale Bóža słužba na 11. njeźeli pó Swětej tšojosći jo weto była něco wósebnego. Tam jo było zmakanje na Šusteroc dwórje, źož by Hanzo Šuster, slědny dudak, swóje 112. narodniny swěśił. To jo była prědna namša, kótaruž jo faraŕka Malinkowa pó góleśinem lěśe w Trjebinje swěśiła, njeglědajucy na dešć. Wóna jo drje k tomu pśiwucona, až se how dwójorěcne namše góźe. Na cedlikach z kjarližami su byli prědny raz kyrije, glorija, kredo a Wóścenaš w slěpjańskej serbskej rěcy wótśišćane. Pla tyźeńskego psalma jo slědowała dalšna pśechwatanka. Jadwiga Malinkowa jo wšych, ako mógu serbski cytaś, pšosyła se z njeju módliś z pomocu pśedlažecych linkow. Chtož to njejo wumógł, jo se nimske módlił. Slěpjańska rěc jo była mócnje słyšaś.