Depsk a Škódow. Šułśic Richard (Matusch) z Depska jo gano swěśił 90. narodny źeń, a to sobotu na 11. juniju w Schirgottojc kjarcmje w Škódowje. Jadnab 70 luźi jo pśišło jomu gratulěrowat, jubilar jo jim kazał na wobjed a kafej. Kradu na tom dnju w Škódowje su měli wejsny swěźeń. A wjednik kapele nAund Michael Matusch (z jubilarom pśi swójźbje; jogo stary nan a Richard stej byłej śeśka) jo z gercymi stupił do zala jubilaroju, jogo žeńskej Anje a gosćam pór štuckow zejgrat. „Wóni su mě pógónili, až deb rejowaś. ‚Chtož móžo na póli źěłaś, ten ga móžo teke rejowaś‘ su gronili“. A to jo na jaden part wěrno – Richard słuša k tym mało luźam, ako we tak wusokem starstwje su pśisamem kuždy źeń na póli. Źeń pśed tym swěźenjom, pětk, kradu na tom 90. narodnem dnju, jo wón z karku karnikelam tšawu holował. „Ja som wót młodego tak nawucony, a mam spódobanje na burskem źěle. Ja źěłam telik, až njesejźim ceły źeń doma a njeglědam telewizor“. Wót 20 ha póla a gólkow ma wětšy źěl pśepachtowane, ale 0,75 ha jo sebje wóstajił. Wón sajźa how zeleny kał, ak wu Šułśic wjelgin rad jěźe. Ale teke trajdu, kulki, majs, głumy a banje.