Z Mósta/Heinersbrück. Wěcej ako 50 wobydlarjow jo pśisło wótpołdnja njeźelu, 1. maja, aby tudy swěśili z wejsneju młoźinu stajanje majskego boma. Jo zazněwała ludowa a šlagrowa muzika z bokse, su pśedawali piśa a grilowe měso, a młode žeńske z młoźiny su se pokazali we wšednej serbskej drastwje.
Akle dopołdnja su młodostne a pomocniki ze jsy wuryli źěrku za bělonu a 16 mejtari wusoku chójcu. Połdnjo, pó tradicionelnem stajanju z drjewjanymi palami, jo ten majski bom stojał na naměstnje mjazy wognjoweju woboru a gmejnskim centrumom. Bom jo měł nimsku chórgoj a brjazu na špicy, a młode brjaze su teke wobdali štom pśi zemi. Wěnk z jeglinow jo młoźina wupyšniła z kwětkami a pisanymi banśikami, pśisamem 12 mejtari dłujku girlandu su wuwili z jedłowych gałuzkow. Pśedewšym źowća z młoźiny su se w běgu tśich dnjow starali wó to.