Z Chóśebuzu/Cottbus. Wukniki źewjetego a jadnastego lětnika Dolnoserbskego gymnaziuma (DSG) mógu se na kubłańskich wikach wó pówołańskich perspektiwach informěrowaś. Togodla su gósći wót serbskich institucijow měli.
Nježli wuknice a wukniki su se 18 stacijow woglědali, jo Měto Nowak jich wuwitał. Wón jo referent nadawk mějucego za nastupnosći Serbow w ministaŕstwje za wědomnosć, slěźenje a kulturu. We pśednosku jo Nowak wjelerakosć pówołańskich móžnosćow wuzwignuł. Zakład tych móžnosćow dej zajm za serbska rěc byś; to groni, až wuknice a wukniki njemusy ned w serbskem konteksće źěłaś, ale deje zajmowane za to byś. Gromaźe z wuknikami jo wón kompetency (serbska rěc, multikulturelne zgromadne žywjenje a tak dalej) zběrał, kenž wóni se na DSG pśiswóje. Wažne za jogo zdaśim jo, až njemusy jaden to studěrowaś, což źěła w pśichoźe. Wón jo na swój žywjenjoběg pokazał, pśeto jo wuceński amt studěrował a akle pózdźej k serbskemu pśišeł.