Dr. Měrćin Wałda jo na klawsurje wulicował wót zmakanjow zastupnikow iniciatiwy z politikarjami. Jich głos zni za jogo zdaśim jadnak: Serby deje sami se rozsuźiś, co kśě. Rowno take wótmyslenje ga iniciatiwa ma – jo Wałda gronił. Rozgrono z Lěwicu jo było za iniciatiwu dobre. Lěwica we swójom erfurtskem programje co mjeńšynam pšawo na sam-se-póstajenje pśiwdaś. Rozgrono ze zastupnikami sakskeje Serbskeje rady z wiźenja Wałdy było „wjelgin chaotiske“. Zgromadne rozgrona z politikarjami koalicije a zastupnikami Domowiny pak su byli z jogo wiźenja tužece: „My smy wopytowali zas a zas wótnowotki do rozgrona z Domowinu pśiś, a w Domowinje su se stawnje pšašali, lěc deje scełego z iniciatiwu powědaś – nic wěcej njejo se stało“.

Martin Schneider jo pśispomnjeł, až Domowina se wiźi rada ako ta jadna zastupnica serbskich interesow, a to mimo alternatiwy. „Wóni měnje, až sejm njeby nic lěpšego pśinjasł napśeśiwo tomu, což južo něnto jo. Weto dejmy z Domowinu gromadu źěłaś“ – jo napominał.