Ze Slěpego/Schleife. Něnt jo jasne a znate, kótare balokoparje z Dolneje a Górneje Łužyce budu Serbow zastupowaś na EUROPEAŹE, ako buźo wót 25. junija do 3. julija w Korytańskej w Awstriskej, dwě lěśe pózdźej, ako jo to było planowane. Do mustwa słuša mimo trenarjow a drugego personala dogromady 25 sportarjow. Mjazy nimi su źaseśo balokoparje z Dolneje Łužyce. To su Christian Rinza (mustwo SG Brjazyna), Florian Šuliš/Schulisch (Lubin), Danny Kobelt (VfB Kśišow), Feliks Šwjela/Schwella (Eintracht Drehnow) Domenik Krötel (Hochoza/Prjawoz), Martin Boseńc/Bossentz (Pśiłuk), Jonas Glode (Pśiłuk), Aleksander Lobeda (MSV Zossen), Ben Boehse (Eintracht Picnjo) a Carl Dietrich (SG Bórkowy). Gromaźe z Frankom Rietschelom (Bischofswerdaer FV) buźotej Sven Balak/Ballack (Eintracht Picnjo), kenž jo teke trenaŕ „Serbskich koparjow“, mustwo wjasć. Frank Norbert Sieg (Chóśebuz) a Markus Kóńcaŕ, jadnaŕ Domowiny, słušatej do wjednistwa mustwa. Głownje zagronity za „Serbske mustwo“, ku kótaremuž słušaju dalšne zastupniki z Górneje Łužyce, jo Clemens Škóda, referent Domowiny.