Z Drjenowa/Drehnow. Južo skóro poł lěta zaběraju se w Drjenowje ze stawiznami jsy, rozglěduju se pó jsy, rozgranjaju, woglědaju luźam, pytaju za starymi dokumentami a fotografijami. Projekt k situaciji serbskego žywjenja w Drjenowje dej pokazaś na wšake aspekty wejsnego žywjenja a pomogaś rozměś, cogodla jo serbska rěc w běgu slědnych jadnab sto lět wóteběrała. Cogodla jo źinsa situacija taka ako jo a kak móžomy ju změniś.

Łoni kóńc lěta jo mjazy drugimi teke Dolnoserbski sekstet sebje wudobył spěchowanje Załožby za serbski lud w ramiku idejowego wuběźowanja pód motom „Rěč wjaza. Rěc zwězujo. Sorbisch verbindet“. Dolnoserbski sekstet z. t. mimo muzikowych produkcijow se teke ze serbskim žywjenim zaběra. Tak jo na pśikład pśed někotarymi lětami iniciěrował stajenje wopomnjeńskeje tofle na Mjertyna Gryza w Hochozy, a z partnarjami zgótował brošurku a informaciske tofle wó Gryzu w tamnjejšem muzeju.